ᐊᖓᔪᖅᑳᕆᔭᐅᔫᑉ ᑐᓴᕋᔅᓴᖓ
ᓯᕗᓪᓕᕐᒥ ᖁᔭᓐᓇᒦᕈᒪᕙᒃᑲ ᐃᓚᒋᔭᐅᔪᑦ ᐃᖅᑲᓇᐃᔮᒥᓂᑦ ᑲᒪᒋᔭᖃᑦᓯᐊᖏᓐᓇᕐᒪᑕ ᓄᕙᔾᔪᐊᕐᓇᖃᕋᓗᐊᖅᑎᓪᓗᒍ ᖃᖓᓕᒫᖅ ᐃᖅᑲᓇᐃᔭᐃᓐᓇᐸᑦᑐᑦ. ᓄᓇᕘᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᐃᓚᒋᔭᐅᔪᓪᓗ ᐱᕙᓪᓕᐅᑎᔅᓯᔪᓐᓇᖅᐳᑦ ᓯᐊᒻᒪᐸᓪᓕᐊᓗᐊᖅᑎᔅᓯᑕᐃᓕᓂᕐᒥᑦ ᖃᓂᒪᓇᐅᔪᒥᑦ ᑕᒫᓂ ᓄᓇᕗᒻᒥ. ᐋᓐᓂᐊᖃᓐᓇᖏᑦᑐᓕᕆᔩᑦ ᐱᓕᕆᔨᖏᑦ ᑕᑯᑎᔅᓯᓚᐅᖅᐳᑦ ᑭᒃᑯᓕᒫᑦ ᐊᔪᙱᓐᓂᓕᒻᒪᕇᑦ ᐅᐊᓯᑯᐊᖅᓯᒪᔪᐃᓐᓇᐅᔪᓐᓇᖏᑦᑐᑦ - ᐃᓚᖏᑦ ᐊᓐᓄᕌᖅᓯᒪᔪᑦ ᐃᖅᑲᓇᐃᔭᖅᑐᒃᓯᐅᑎᓂᑦ. ᖁᔭᓐᓇᒦᒍᒪᕙᒃᑲ ᐃᓚᒋᔭᐅᔪᑦ ᐃᖃᓗᖕᓂ ᑲᔪᓯᕙᓪᓕᐊᖏᓐᓇᕐᓂᖏᓐᓄᑦ ᐊᑦᓱᕈᓐᓇᒃᑲᓗᐊᖅᑎᓪᓗᒍ ᓴᓗᒪᔪᒥ, ᐃᒥᑦᑎᐊᕙᒻᒥᑦ ᐃᒥᖃᖅᑎᔅᓯᓂᓯ ᐃᓅᖃᑎᔅᓯᓐᓂᑦ ᐃᒥᓪᓗᐃᓐᓇᖅᑎᓪᓗᒍ. ᐃᓚᒋᔭᐅᔪᑦ ᐱᓇᓱᐊᖏᓐᓇᕐᓂᖏᓐᓄᑦ ᓄᓇᕗᒻᒥᐅᑦ ᓯᕗᒧᑉᐸᓪᓕᐊᔪᓐᓇᖅᐳᑦ. ᐃᓚᒋᔭᐅᔪᑦ ᓄᓇᕗᒻᒥᐅᓂᑦ ᒪᑭᑕᑎᔅᓯᒪᑕ ᐊᑦᑕᓇᖅᑐᒦᒃᑲᓗᐊᖅᑐᑎᑦ ᑐᓂᕐᕈᑎᓯᒪᔪᑦ ᐱᓕᕆᔪᒪᓪᓗᑎ ᖃᖓᓕᒫᖅ ᓄᖅᑲᖓᓚᐅᖅᓯᒪᓇᑎᑦ ᑐᐊᕕᓐᓇᖅᑐᖃᓕᕋᓗᐊᖅᑎᓪᓗᒍ.
ᑕᖅᑮᑦ ᒪᕐᕉᒃ ᐅᖓᓕᐊᓂ, ᓂᕈᐊᖅᑕᐅᔪᒐᒪ ᐊᖓᔪᖅᑳᖑᖁᔭᐅᓗᖓ ᓄᓇᕘᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ. ᑕᐃᒪᙵᓂ ᐱᔭᔅᓴᖃᐃᓐᓇᖅᑐᒍᑦ ᐱᔭᔅᓴᖃᕋᓐᓄᒃ: ᐊᑐᐃᓐᓇᐅᑎᔅᓯᓪᓗᑎᑦ ᓯᕗᓪᓕᖅᐹᒥᑦ ᑲᑐᔾᔨᖃᑎᒌᓐᓂᕐᒥᑦ ᐃᓕᓐᓂᐊᖅᑎᑕᐅᓂᐅᔪᒧᑦ ᐊᕐᕌᒍᐃᑦ ᒪᕐᕉᒃ ᐃᓱᓕᓚᐅᖏᑎᓪᓗᒋᑦ; ᐱᓕᖅᐸᓪᓕᐊᑎᔅᓯᓂᕐᒥᑦ ᐊᒻᒪᓗ ᐊᖅᑭᐸᓪᓕᐊᑎᔅᓯᓂᕐᒧᑦ ᑐᓴᐅᒪᑎᔅᓯᓂᕐᒥᑦ ᐃᓚᒌᓄᑦ; ᐊᒥᓱᐊᖅᑎᓪᓗ ᐊᐱᔅᓱᒐᐅᓪᓗᓂ ᐱᕙᓪᓕᐊᔪᓕᕆᔨᖕᓄᑦ ᖃᓄᐃᓕᖓᓕᕐᓂᖏᑦ ᖃᓄᐃᖕᓂᐅᔪᑦ ᐃᓚᒋᔭᐅᔪᓄᑦ ᐃᑉᐱᒋᔭᐅᔪᓪᓗ; ᐊᒻᒪᓗ ᒪᓕᒐᓂᐊᖅᑎᓂᑦ ᑐᓴᐅᒪᑎᔅᓯᓂᐅᔪᒥᑦ ᐱᒍᒪᔭᑦᑎᓐᓂᓪᓗ ᑐᑭᓯᑎᔅᓯᓇᓱᑦᑐᑕᓗ (MLA’s) (ᐊᑖᓃᑦᑐᖅ ᑕᑯᒍᒃ) ᐊᒻᒪᓗ ᐊᓯᖏᑦ ᓯᕗᓕᖅᑏᑦ ᐃᓚᒋᔭᐅᖃᓯᐅᑎᓗᓂ ᓂᕈᐊᖅᑕᐅᓯᒪᔪᖅ ᓘᕆ ᐃᓪᓚᐅᖅ ᒐᕙᒪᑐᒃᑯᓐᓂ ᓄᓇᕗᒻᒧᑦ ᑭᒡᒐᑐᖅᑎ ᐊᒻᒪᓗ ᔭᒡᒦᑦ ᓯᖕ ᒪᓕᒐᓕᐅᕝᕕᔾᔪᐊᑉ ᑭᒡᒐᖅᑐᖅᑎᖓ - ᐱᕈᖅᐸᓪᓕᐊᓗᓄᒃ ᐊᒻᒪᓗ ᐊᖅᑭᐸᓪᓕᐊᓗᓄᒃ ᑕᒪᒃᑕ.
ᑲᔪᖏᖅᓱᐃᒋᐊᕐᐸᑦᑕᒃᑲ ᓄᓇᕗᒻᒥ ᒐᕙᒪᒃᑯᑦ ᐅᖃᐅᓯᖃᑐᐃᓐᓇᖏᓪᓗᑎᑦ “ᐃᖅᑲᓇᐃᔭᕐᕕᒃ ᓂᕈᐊᖅᑕᐅᓯᒪᔪᖅ” ᐊᒻᒪᓗ ᑕᑯᔅᓴᒥᑦ ᐊᑐᓕᖅᑎᔅᓯᓗᑎᑦ “ᐃᖅᑲᓇᐃᔭᕐᕕᒃ ᓂᕈᐊᖅᑕᐅᓯᒪᔪᒥᑦ” ᑕᕝᕘᓇᓗ ᑕᑯᑎᔅᓯᖁᓪᓗᒋᑦ ᓄᓇᕗᒻᒥᐅᓂᑦ ᐃᖅᑲᓇᐃᔭᕐᕕᔅᓯᐊᕙᐅᒋᐊᖏᓐᓂᑦ.
ᒫᓐᓇᓕ, ᐊᐱᕆᕗᒍᑦ ᐃᓕᔅᓯᓐᓄᑦ ᐃᑲᔪᖅᑕᐅᔪᒪᒐᑦᑕ ᓄᓇᕗᒻᒥ ᒐᕙᒪᒃᑯᖏᑦ ᓈᒻᒪᑦᑐᒥᑦ ᐃᖅᑲᓇᐃᔭᖅᑎᖁᑎᖏᓐᓂᑦ ᑲᒪᒋᔭᖃᑦᓯᐊᓕᕋᓗᐊᕐᒪᖔᑕ (ᐊᒻᒪᓗ ᓄᓇᕗᒻᒥᐅᓕᒫᑦ ᐱᓪᓗᒋᑦ) ᐃᓚᒋᔭᐅᓗᑎᑦ ᑎᑎᖅᑲᑯᑦ ᒪᓕᒐᓕᐅᖅᑎᓄᑦ (ᐃᑲᔪᖅᓱᐃᖁᓪᓗᒋᑦ ᓄᓇᕗᒻᒥᐅᓂᑦ ᐃᑭᐊᖅᑭᕕᐊᓄᑦ ᑐᕌᕈᑎ) herefornunavut.ca ᐱᔪᒪᔭᖏᓐᓂᑦ.
ᓂᕆᐅᒋᔭᖃᔅᓯᐊᖅᐳᖓ ᑐᑭᓯᓇᖅᓯᓕᕐᐸᓪᓕᐊᓂᖓᓂᑦ ᑭᒡᒐᖅᑐᐃᔨᓯ ᐊᓯᔾᔨᐸᓪᓕᐊᖁᔨᓕᖕᒪᑕ ᐊᑐᓕᖅᑎᔅᓯᓂᕐᒥᑦ ᐃᓚᒋᔭᐅᔪᓄᑦ ᐃᑲᔫᑎᖃᓂᐊᖅᑐᓂᑦ. ᑕᒪᓐᓇ ᑐᑭᓯᓇᖅᓯᑎᓯᒪᓗᒍ ᐱᓇᓱᐊᕐᓂᐊᖅᑕᕗᑦ ᐊᖅᑭᖅᓱᐃᐸᓪᓕᐊᓂᒃᑯᑦ ᐱᓕᕆᐊᕆᔭᕗᑦ ᑕᑯᓪᓗᒋᑦ:
- ᓄᓇᓕᖕᓄᑦ ᐳᓚᕋᒃᑎᔅᓯᓗᑕ ᐊᕐᕌᒍᒻᒥᑦ ᓄᑖᒥ ᐃᓚᒋᔭᐅᔪᑦ ᓄᓇᓕᓕᒫᓂᑦ ᐃᓚᒋᔭᐅᑦᓯᐊᖃᑦᑕᖁᓪᓗᒋᑦ;
- ᐃᑲᔪᖅᓱᐃᓂᖅ ᐊᐅᓚᑦᓯᓂᕐᒥᑦ ᓄᓇᓕᖕᓂᑦ ᐊᕐᕌᒍᓕᒫᖅᓯᐅᑎᓂᑦ ᑲᑎᒪᑎᔅᓯᓪᓗᑕ ᑕᐃᒫᔅᓴᐃᓐᓇᖅ ᐊᑐᓚᐅᖅᑕᑦᑎᓐᓂᑦ ᒪᓕᓪᓗᑕ (ᐃᓚᒋᔭᐅᔪᑦ ᓇᓗᓇᐃᒃᑯᑕᓕᒃ 006 ᐊᒻᒪᓗ 007);
- ᐃᑲᔪᖅᓱᐃᓂᒃᑯᑦ ᐱᐅᓂᖅᓴᒥᑦ ᐊᑐᓕᖅᑎᔅᓯᓗᑕ ᐃᓚᒋᔭᐅᔪᑦ ᑲᒪᒋᔭᐅᑦᓯᐊᖁᓪᓗᒋᑦ ᐃᖅᑲᓇᐃᔭᖅᑎᕐᑖᕐᓗᑕ ᓇᒻᒥᓂᖅ ᒪᓕᒐᓕᕆᔨᒥᑦ ᓯᕗᓕᔅᓴᑎᓐᓂᑦ (ᑕᒪᓐᓇ ᑲᔪᓯᑉᐸᑦ ᓄᓇᕘᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᓯᕗᓪᓕᐅᓗᓂ ᐅᑭᐅᖅᑕᖅᑐᒥᑦ ᑭᒃᑯᓕᒫᓄᑦ ᑭᒡᒐᖅᑐᐃᔩᑦ ᑲᓇᑕᒥ (PSAC) ᓇᒻᒥᓂᖅ ᒪᓕᒐᓕᕆᔨᖃᖁᓪᓗᒋᑦ.
- ᒫᓐᓇᒃᑯᑦ ᐃᖅᑲᓇᐃᔮᔅᓴᒧᑦ ᐃᓚᑖᒐᓱᖕᓂᖅ (ᕿᑎᕐᒥᐅᓄᑦ ᐱᔨᔅᓯᕋᖅᑎᔅᓴᒥᑦ);
- ᓯᕗᒧᑎᔅᓯᓂᖅ ᐃᑲᔪᖅᓱᐃᓂᑦᑎᓐᓂᑦ ᐊᖏᖃᑎᒌᕈᑎᔅᓴᒧᑦ ᐃᓘᓐᓇᖏᓐᓄᑦ ᐃᓚᒋᔭᐅᔪᑦ ᐱᓪᓗᒋᑦ ᓄᓇᕘᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ ᑕᐃᒫᔅᓴᐃᓐᓇᖅ ᐊᑐᖅᑕᐅᓚᐅᖅᑐᒥᑦ ᐃᖃᓗᒃᑑᑦᓯᐊᕐᒥᐅᑦ ᐃᓪᓗᓕᕆᔨᒃᑯᖏᓐᓄᑦ ᐊᒻᒪᓗ ᒥᑦᑎᒪᑕᓕᖕᒥᑦ ᐃᓪᓗᓕᕆᔨᒃᑯᖏᓐᓄᑦ.
- ᐱᒋᐊᖅᑎᔅᓯᓂᕐᒥᑦ ᓄᑖᒥᑦ ᐱᔭᕆᐊᑭᑦᑐᒥᑦ ᑐᕌᕈᑎᖃᕐᓗᓂ ᐃᑭᐊᖅᑭᕕᒃᓴᖅ neu.ca ᐊᑐᐃᓐᓇᒐᔅᓴᐅᓗᓂ ᑐᓴᐅᒪᔾᔪᑎᔅᓴᐅᓗᓂᓗ.
- ᑕᐃᓐᓇᓗ ᐊᑐᖅᑕᕗᑦ ᖃᓄᖅᑑᒍᓐᓇᐅᑎᒋᓗᒍ ᖃᕆᓴᐅᔭᖕᓂ Facebook page ᑐᓴᐅᒪᑎᔅᓯᓂᕐᒥᑦ ᓱᕐᓗ ᓄᓇᓕᖕᓄᑦ ᐳᓚᕋᓐᓂᐊᖅᑎᓪᓗᑕ, ᑲᑎᒪᑎᔅᓯᓂᐊᕐᑎᓪᓗᑕᓘᓐᓃᑦ ᐊᒻᒪᓗ ᐊᓯᖏᓐᓂᑦ ᐱᔭᔅᓴᖃᓂᐊᕈᑦᑕ ᖃᓄᕐᓗ ᐃᓚᒋᔭᐅᔪᓐᓇᕐᒪᖔᖅᐱᑦ (ᔭᓐᓄᐊᕆ 31, 2022) ᓵᓚᔅᓴᒐᓱᐊᖅᑐᓄᑦ ᐊᒧᔭᐅᒐᓱᑦᑐᓄᑦ ᖃᖓᑦᑕᐅᑎᔅᓴᓄᑦ ᐅᑎᒧᑦ ᑕᐃᓐᓇᓗ ᐊᒧᔭᐅᕕᔅᓴᓕ ᕕᕝᕗᐊᕆ 14, 2022ᖑᓕᖅᐸᑦ.
ᑎᓯᐱᕆᐅᓕᕐᒥᖕᒪᑦ ᒪᕐᕉᓐᓂᒃ ᕿᒪᐃᒍᒪᕗᖓ ᐅᖃᐅᓯᒃᓴᓂᒃ.
ᑎᓯᐱᕆ 6ᖑᑎᓪᓗᒍ ᓇᓪᓕᐅᓂᖅᓯᐅᓂᐊᕐᒪᑕ ᑲᓇᑕᓕᒫᒥ ᐃᖅᑲᐅᒪᓗᑕ ᐊᒻᒪᓗ ᐱᒋᐊᖅᑎᔅᓯᓂᕐᒥᑦ ᐃᓕᒪᓇᖅᑐᒦᖁᓇᒋᑦ ᐊᕐᓇᐃᑦ. ᐱᒻᒪᕆᐅᑎᒋᕗᖅ ᑕᐃᒃᑯᐊ ᐃᖅᑲᐅᒪᔭᕆᐊᖃᕋᑦᑎᒍᑦ ᐱᕋᔭᑦᑕᐅᕙᑦᑐᑦ ᓄᓕᐊᖕᓂᖏᑦ ᐱᓪᓗᒋᑦ ᐱᓂᓪᓗᖅᑕᐅᓯᒪᓂᖏᓐᓄᑦ ᐊᒻᒪᓗ ᑕᐃᒃᑯᐊ ᐃᖅᑲᐅᒪᓗᒋᑦ ᐃᓅᔪᓐᓃᖅᓯᒪᔪᑦ. ᒫᓐᓇᐅᔪᖅ ᐱᒋᐊᖅᑎᔅᓯᓗᑕ ᐱᓕᕆᖃᑎᒌᓐᓂᒃᑯᑦ, ᑕᒪᓐᓇ ᑲᔪᓯᔪᓐᓇᕐᑐᖅ ᓄᓕᐊᖕᓂᖏᑦ ᐱᓪᓗᒋᑦ ᐱᓂᓪᓗᖅᑕᐅᕙᑐᑦ ᓄᖅᑲᖅᑎᑕᐅᔭᕆᐊᖃᕐᓂᖏᓂᑦ ᐃᖅᑲᐅᒪᑦᓯᓗᑕ ᑭᖑᕚᑦᑎᓐᓂᑦ ᐃᓕᓐᓂᐊᕈᑎᒋᓗᒋᓪᓗ, ᓈᓚᒃᐸᓪᓗᒋᑦ ᐃᓅᔪᑦ ᐊᒻᒪᓗ ᐅᖃᐅᓯᒋᓗᒋᑦ ᓈᒻᒪᓴᖏᓐᓂᕗᑦ ᖃᓄᐃᓘᖅᑕᐅᕙᑦᑐᒥᓂᐅᓂᖏᑦ. ᓂᓪᓕᐅᑎᒋᕙᑉᐱᐅ ᑕᒪᓐᓇ ᐅᓪᓗᒥ?
ᑭᙳᓪᓕᖅᐹᒥᑦ, ᖁᕕᐊᓱᕝᕕᐅᑉ ᐅᓪᓗᖏᑦ ᐊᒡᒋᐸᓪᓕᐊᓕᕐᒥᖕᒪᑕ, ᑕᖃᐃᖅᓯᓗᑎᑦ, ᓇᒻᒥᓂᖅ ᑲᒪᒋᑦᓯᐊᕐᓗᑎᑦ ᐊᒻᒪᓗ ᐃᓚᑎᑦ ᑲᑎᒪᑦᓯᐊᕐᓂᐊᕆᕙᑎᑦ. ᖃᓄᐃᓘᖅᑕᑎᑦ, ᖁᕕᐊᒋᓗᒋᑦ ᐊᒻᒪᓗ ᐃᓕᓴᕆᓗᒋᑦ ᐃᑲᔪᖅᑕᐅᔭᕆᐊᓖᑦ ᑐᙵᓱᑦᑎᓪᓗᒋᑦ ᖁᕕᐊᓱᕝᕕᐅᑉ ᐅᓪᓗᖏᓐᓂᑦ.
ᖁᕕᐊᓲᑎᒋᓗᒍ ᑲᔪᓯᓂᖃᑦᓯᐊᖁᓪᓗᒍᓪᓗ 2021 ᐊᒻᒪᓗ ᐊᔪᐃᓐᓈᖃᕐᓗᑕ ᐱᓇᓱᐊᖅᑕᑦᑎᓐᓂᑦ ᓄᓇᕗᒻᒥᐅᑦ ᐱᐅᓂᖅᓴᒥᑦ ᐃᓂᖃᖁᓪᓗᒋᑦ 2022ᖑᓕᖅᐸᑦ.
ᑲᑐᔾᔨᖃᑎᒌᓐᓂᒃᑯᑦ, ᔭᐃᓴᓐ ᕉᓵᓐ, ᓄᓇᕘᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᐊᖓᔪᖅᑳᖓᑦ.