ᕿᑲᕐᓇᐅᓂᐊᓕᖅᑎᓪᓗᒍ ᑐᓴᒐᒃᓴᐃᑦ ᐊᖓᔪᖄᖓᓂᒃ ᓄᓇᕗᒻᒥ ᐃᖃᓇᐃᔭᖅᑏᑦ ᑳᑐᔾᔨᖃᑎᒌᑦ ᑕᐱᕇᖏᓐᓂ
ᑎᓯᐱᕆ 2023
ᑎᑭᓯᒪᓕᕐᒥᒐᑦᑕ ᑭᖑᓪᓕᕐᒥ ᑕᕿᕐᒥ ᑕᒫᓂ ᐊᕐᕌᒍᒥ, ᐃᓱᒪᒋᕙᒃᑕᕗᑦ ᐊᒥᓱᐃᖅᑕᖅᓱᒋᑦ ᐊᓯᔾᔨᖅᐸᒃᑐᖅ ᓲᕐᓗ ᓯᓚᐅᑉ ᐊᓯᔾᔨᖅᐸᖕᓂᖓᑎᑐᑦ, ᐃᓱᓕᕝᕕᒃᓴᖓᓄᑦ ᐃᓕᓐᓂᐊᕐᓇᐅᑉ ᐊᒻᒪᓗ ᐊᑐᕐᓂᐊᓕᕐᒥᔭᑦᑎᓐᓂ ᕿᑲᕐᓇᐅᓂᐊᓕᖅᑐᒥ. ᑎᓯᐱᕆᒥᑦᑕᐅᖅ ᐱᕕᒃᓴᐅᕙᖕᒥᔪᖅ ‘ᐱᔭᕇᖅᓯᕙᓪᓕᐊᓕᕈᓐᓇᕐᓂᖅ’ ᐊᕐᕌᒍᒥᒃ ᑲᒪᒋᓚᐅᖅᑕᑦᑎᓐᓂᒃ, ᑕᑯᓇᒋᐊᕐᓗᑕᓗ ᑭᖑᒧᑦ ᖃᓄᐃᓕᐅᓚᐅᕐᓂᑦᑎᓐᓂᒃ.
2023−ᒥ ᐱᒻᒪᕆᐅᓂᖅᐹᖑᓚᐅᖅᑐᖅ ᐅᓂᒃᑳᖑᓂᖓ ᐱᔾᔪᑎᖃᖅᑐᖅ ᑕᕿᓂᒃ ᓯᑕᒪᓂᒃ ᐊᕝᕙᖓᓂᒡ ᐃᓚᖃᓚᐅᖅᑐᒥᒃ ᓄᖃᖓᑎᑦᑎᑲᐃᓇᓚᐅᕐᓂᖏᑦ ᐃᖃᓗᖕᓂ ᐃᒡᓗᓕᕆᔨᒃᑯᑦ ᐃᖃᓇᐃᔭᖅᑎᖏᑦ. ᑕᒪᒃᑯᐊ ᓄᓇᕗᒻᒥ ᐃᖃᓇᐃᔭᖅᑎᑦ ᑲᑐᔾᔨᖃᑎᒌᖏᑦ ᑕᐱᕇᑦ (ᐃᖃᓇᐃᔭᖅᑏᑦ ᑕᐱᕇᖏᑦ) ᓂᒡᓚᓱᓕᖅᑐᖕᒥ, ᖁᐊᖅᐸᓪᓕᐊᓕᖅᑐᒥ ᐊᓃᖃᑕᐃᓐᓇᓚᐅᕐᒪᑕ ᓯᓚᓗᒃᐸᓚᐅᖅᑐᒥ, ᐱᓇᓱᐊᕈᑎᖃᕐᓂᕐᒧᑦ ᓈᒻᒪᖕᓂᖅᓴᓂᒃ ᐊᑐᓕᖁᔨᓂᖏᓐᓂᒃ, ᐊᑭᓕᖅᑑᖅᑕᐅᕙᓂᖏᓐᓄᑦ, ᐃᒃᐱᒋᔭᐅᑦᑎᐊᕐᓂᖅᓴᐅᔭᕆᐊᖃᕐᓂᖏᓐᓂᓗ ᓴᓇᔩᑦ ᐊᒻᒪᓗ ᐱᑦᑎᐊᖅᑕᐅᖃᑦᑕᕆᐊᖃᕐᓂᖏᓐᓂᒃ ᐃᖃᓇᐃᔭᖅᑎᐅᔪᑦ. ᐱᓇᓱᐊᖃᑕᐃᓐᓇᓚᐅᕐᒥᔪᑦ ᑕᒪᐃᓐᓂᒃ ᐱᔾᔪᑎᓪᓗᓂᒋᑦ ᐊᓯᖏᑦ ᐃᖃᓇᐃᔭᖅᑎᓕᒫᑦ ᓄᓇᕗᒻᒥ. ᑕᒪᓐᓇ ᓄᖃᖓᑎᑦᑎᓕᓚᐅᕐᓂᖅ ᐱᔾᔪᑕᐅᓕᓚᐅᖅᑐᖅ ᓴᕿᑎᑦᑎᔪᓐᓇᕐᓂᖅ ᑕᒪᐃᓐᓂᒃ ᓈᒻᒪᖕᓂᖅᓴᓂᒃ ᐃᖃᓇᐃᔭᖅᑎᓄᑦ ᐊᖏᕈᑎᒃᓴᖏᓐᓂᒃ ᒪᓕᒐᖃᕈᑕᐅᓂᐊᓕᖅᑐᓂᒃ ᑕᒪᐃᓐᓂᒃ ᐊᑎᓕᐅᖃᑕᐅᓯᒪᔪᓄᑦ ᑕᐱᕇᖏᓐᓄᑦ ᐃᒡᓗᓕᕆᔨᒃᑯᓐᓂᒃ ᐊᒻᒪᓗ ᓄᓇᓕᖕᓂ ᑲᑎᒪᔨᓂᒃ ᐃᖃᓇᐃᔭᖅᑎᐅᖃᑕᐅᔪᓄᑦ.
ᐊᑐᕐᓂᖓᓂ ᐊᕐᕌᒍ 2023, ᐃᖃᓇᐃᔭᖅᑏᑦ ᑕᐱᕇᖏᑦ ᐱᓕᕆᓚᐅᕐᒪᑕ ᐊᖏᖃᑎᒌᒑᓱᐊᕐᓂᖏᓐᓂᒃ ᑕᒪᐃᓐᓄᑦ ᐃᖃᓇᐃᔭᖅᑎᖏᓐᓄᑦ ᐊᖏᕈᑎᒋᔭᐅᓂᐊᓕᖅᑐᓂᒃ, ᐃᖃᓱᒃᑐᓂᒃ ᐊᓯᔾᔨᖅᓯᒪᓕᖅᑐᓂᒃ ᓇᓂᑐᐃᓐᓇᖅ ᐊᒃᑐᖅᑕᐅᓯᒪᓂᖏᑦ ᐃᖃᓇᐃᔭᖅᑏᑦ ᐃᓚᔭᐅᖁᔨᓪᓗᑎᒃ ᓄᖃᖓᑲᐃᓐᓇᕈᓐᓇᕆᐊᖃᕐᓂᖏᓐᓂᒃ ᖃᖓᑐᐃᓐᓇᖅ ᐃᓚᒌᒃᑐᓂ ᐋᓐᓂᖅᑎᖅᑕᐅᓯᒪᔪᖃᕐᓂᕐᒧᑦ ᐊᒻᒪᓗ ᐱᓇᓱᐊᖃᑕᕈᓐᓇᕆᐊᖃᕐᓂᖏᓐᓂ ᐃᓄᐃᑦ ᐃᓕᖅᑯᓯᑐᖃᕐᒥᓂᒃ ᒪᓕᒃᑐᓂᒃ ᐊᓇᐅᒪᔾᔪᑎᒃᓴᖏᓐᓂᒃ, ᐃᓕᑕᕆᔭᐅᖁᓪᓗᒋᓪᓗ ᐃᓄᐃᑦ ᐅᖃᐅᓯᑐᖃᖏᑦ ᐊᒻᒪᓗ ᐃᓕᖅᑯᓯᑐᖃᖏᑦ ᐃᓄᐃᑦ ᓄᓇᕗᒻᒥ ᐃᖃᓇᐃᔭᕐᕕᖕᓂ.
ᐃᖃᓇᐃᔭᖅᑏᑦ ᑲᑉᐱᐊᓱᓕᖅᑕᐃᓕᒪᐃᓐᓇᕆᐊᖃᓚᐅᕐᓂᖏᑦ, ᐊᖀᖃᑎᖃᕈᒪᐃᓐᓇᓚᐅᕐᓂᖏᑦ, ᑕᐱᕇᖏᓐᓇᕈᓐᓇᓚᐅᕐᓂᖏᓪᓗ ᐃᒡᓗᓕᕆᔨᒃᑯᓐᓂ ᐱᓕᕆᔩᑦ, ᖃᐅᔨᒪᔭᐅᑦᑎᐊᕆᐊᖃᖅᑐᑦ. ᐱᓇᓱᐊᖅᓯᒪᐃᓐᓇᕐᓂᖏᓐᓄᓂᑦ ᖃᐅᔨᕚᓪᓕᕈᑕᐅᓪᓚᕆᓚᐅᕐᒪᑕ ᑲᓇᑕᓕᒫᒥ ᐃᓱᒪᓘᑕᐅᕙᒃᑐᓂᒃ ᐃᓄᖕᓄᑦ ᐃᖃᓇᐃᔭᖅᑎᓄᑦ ᓄᓇᒥᓂ ᓄᓇᕗᒻᒥ ᐊᒻᒪᓗ ᖃᐅᔨᒪᓕᖅᓱᑎᒃ ᓈᒻᒪᖏᒻᒪᕆᒃᑐᓂᒃ ᐊᑐᖃᑦᑕᕐᓂᖏᓐᓂᒃ ᐃᓂᖏᖅᑕᐅᕙᒃᓱᑎᒃ ᑭᖑᕝᕕᖅᑎᓄᑦ ᐃᖃᓇᐃᔭᖅᑎᐅᖏᓇᖅᑑᒐᓗᐊᑦ, ᐊᑭᑐᔪᐊᓘᓂᖏᓐᓂᓗ ᖃᓪᓗᓈᓂᖓᖅᑐᓂᒃ ᑳᓐᑐᓛᒃᑎᐅᕙᒃᑐᑦ ᐱᓕᕆᔨᑖᖃᑕᕐᓂᖏᑦ ᐊᒻᒪᓗ ᐃᓇᖐᕙᒃᑐᓂᒃ ᐃᓕᓯᕙᖕᓂᖏᑦ ᐃᖃᓇᐃᔭᖅᑎᐅᑲᐃᓐᓇᕐᓂᐊᖅᑐᓂᒃ ᓄᓇᕗᒻᒥ
ᑕᕿᓪᓗᑲᓴᐅᓚᐅᖅᑐᒥ, 9−ᒋᓕᖅᑕᖓᓐᓂᒃ ᑲᑎᒪᕐᔪᐊᓚᐅᕐᓂᖏᓐᓂ, ᐱᖓᓱᑕᒫᑦ ᐊᕐᕌᒍᐃᑦ ᓈᓂᑕᒫᖅ ᐊᑐᖅᐸᒃᑕᒥᓂᒃ, ᐃᖃᓇᐃᔭᖅᑏᑦ ᑕᐱᕇᖏᓐᓄᑦ ᓂᕈᐊᖅᑕᐅᒃᑲᓐᓂᓚᐅᕋᒪ ᐊᖓᔪᖄᖓᓄᑦ, ᑎᓕᔭᐅᒃᑲᓐᓂᖅᓱᖓᓗ ᓄᑖᓂᒃ ᐱᖓᓱᓂᒃ−ᐊᕐᕌᒎᓂᐊᖅᑐᓂᒃ ᑲᔪᓯᑎᑦᑎᕙᓪᓕᐊᖁᔭᐅᓂᖅ ᓴᖏᓂᖅᓴᐅᔪᓐᓇᖅᑐᓂᒃ ᑕᐱᕇᖕᓂᒃ ᐃᖃᓇᐃᔭᖅᑎᓄᑦ. ᐃᖃᓇᐃᔭᖅᑏᑦ ᑕᐱᕇᑦ ᑲᑎᒪᕐᔪᐊᕐᕕᖓᓂ ᐃᓱᒪᖃᓚᐅᖅᐳᑦ ᐱᐅᔫᑎᓂᒃ ᐊᓯᔾᔩᓯᒪᓕᕐᓂᖏᓐᓂᒃ ᑕᐃᒪᖓᑦ ᐊᖓᔪᖄᖑᓚᐅᕐᓂᓂᒃ ᐱᒋᐊᖅᑎᑕᐅᓚᐅᖅᓯᒪᔪᓂ ᓄᕕᐱᕆ 2021−ᒥ. ᑕᒪᑐᒪᓂ ᑲᑎᒪᕐᔪᐊᕐᓂᖏᓐᓂ ᐊᒥᓲᓂᖅᐹᖑᓚᐅᖅᑐᑦ ᑲᑎᒪᔭᖅᑐᖅᓯᒪᔪᑦ ᐊᒻᒪᓗ ᐊᔾᔨᒌᖏᑦᑑᑎᐅᓂᖅᐹᓂᒃ ᑲᑎᒪᐅᑎᖃᓚᐅᖅᑐᖅ ᐃᖃᓇᐃᔭᖅᑏᑦ ᑕᐱᕇᓂᖏᑦ ᑕᐃᒪᖓᑦ 25 ᐊᕐᕌᒍᓂᒃ ᑲᑐᔾᔨᖃᑎᒌᖑᓕᕐᓂᖏᓐᓂᒃ. ᑲᑎᒪᔭᖅᑐᖅᓯᒪᔪᑦ ᓇᑭᑐᐃᓐᓇᖅ ᓄᓇᕗᒻᒥ ᓂᕈᐊᓚᐅᖅᑐᑦ ᒪᒃᑯᖕᓂᖅᓴᒥᒃ, ᐊᔾᔨᒌᖏᑦᑑᑎᓂᒃ ᐃᖃᓇᐃᔮᖃᖅᑐᓂᒃ ᑎᒥᖁᑎᒥᓄᑦ ᐊᐅᓚᑦᑎᔨᐅᖃᑕᐅᓂᐊᓕᖅᑐᓂᒃ ᐃᖃᓇᐃᔭᖅᑏᑦ ᑕᐱᕇᖏᓐᓄᑦ ᐱᔨᑦᑎᕋᐃᔨᐅᖃᑕᐅᓂᐊᓕᖅᑐᓂᒃ.
ᓴᖏᓂᖏᑦ ᑕᐱᕇᑦ ᑕᐃᒪᖓᑦ ᐱᒋᐊᖅᑳᓲᖑᕗᑦ ᓄᓇᓕᖕᓂ, ᓯᕗᒧᓪᓗ ᑕᐅᑐᒃᐳᒍᑦ ᐊᕐᕌᒍᒧᑦ 2024 ᓴᖏᔫᖏᓐᓇᖁᓪᓗᒋᑦ ᓄᓇᓕᖕᓂ ᐃᓚᒋᔭᐅᔪᑦ ᓄᓇᒥᓂ ᑕᐱᕇᖕᓂ. ᓯᕗᒧᑦ ᓂᕆᐅᒃᑐᖓ ᐱᓕᕆᖃᑎᖃᑦᑎᐊᕈᒪᓂᖅ ᓄᑖᓃᒃ ᐊᐅᓚᑦᑎᔩᑦ ᑲᑎᒪᔨᖏᓐᓂᒃ ᑕᒪᒃᑯᐊ ᑐᕌᒐᕆᔭᐅᔪᑦ ᑎᑭᐅᑎᔪᓐᓇᕈᒪᓪᓗᒋᑦ. ᑲᔪᓰᓐᓇᕐᓂᐊᖅᑐᒍᑦ ᓄᓇᓕᖕᓄᖓᐅᖃᑦᑕᕈᒪᓂᖅ ᑕᒫᓂ 2024−ᒥ, ᓄᑖᓂᒃ ᓄᓇᓕᖕᓂ ᐃᓚᑖᕈᒪᓂᕐᒧᑐᐃᓐᓇᐅᖏᑦᑐᖅ, ᒪᑯᓂᖓᑕᐅᖅ ᐱᒋᐊᖅᑎᑦᑎᔪᒪᓂᕐᒧᑦ ᐊᔪᕈᓃᖅᓴᐃᔪᓐᓇᕐᓂᖅ, ᐃᓕᓐᓂᐊᖅᑎᑦᑎᔪᓐᓇᕐᓂᖅ, ᐃᓚᐅᑎᑦᑎᔪᓐᓇᕐᓗ ᐃᖃᓇᐃᔭᖅᑎᓂᒃ ᐊᖏᕐᕋᖏᓐᓂ ᓄᓇᓕᖏᓐᓂ.
ᓯᕗᓂᒃᓴᒧᑦ ᑐᕌᖓᓗᑕ, ᕿᑲᕐᓇᐅᓂᐊᓕᕐᒥᔪᒥ ᐊᒻᒪᓗ ᐊᕐᕌᒎᒥ ᓄᖑᓂᐊᖅᑐᒥ 2024−ᒥ, ᐱᔫᒥᓴᐃᕗᖓ ᑕᒪᐃᓐᓂᒃ ᐃᓚᓕᐅᑎᓯᒪᔪᓂᒃ ᐱᕕᒃᓴᓕᐅᑦᑎᐊᖁᔨᓂᖅ ᕿᑲᑦᑎᐊᕈᓐᓇᖁᓪᓗᒋᑦ, ᐃᓱᒫᓗᖏᒃᑲᐃᓐᓇᕐᓗᑎᒃ, ᐃᖕᒥᓂᒃ ᒥᐊᓂᕆᑦᑎᐊᕐᓗᑎᒃ ᑎᒥᒃᑯᑦ ᐃᓱᒪᑯᓪᓗ , ᐃᓚᖃᕈᓐᓇᕐᓗᑎᒃ ᐱᖃᑎᐊᓗᖕᒥᓂᒃ, ᐃᓚᒥᓂᒃ, ᓇᒡᓕᔭᒥᓂᒡᓗ.
ᖃᖓᑕᓲᒃᑯᑦ ᐊᐅᓪᓛᕐᓂᐊᖅᑐᓂᒃ, ᐃᖃᐃᑎᒋᐊᕈᒪᖕᒥᔪᖓ ᐃᖃᓇᐃᔭᖅᑎᑦᑕ ᑕᐱᕇᖏᖕᓄᑦ ᐃᓚᒋᔭᐅᔪᑦ ᐊᑭᑭᒡᓕᒋᐊᕈᑎᒃᓴᖃᖅᑎᑕᐅᕙᒻᒪᑕ ᖃᖓᑕᓲᒃᑯᑦ ᑲᓃᑎᔭᓐ ᓄᐊᑦᑯᑦ ᐊᒻᒪᓗ ᑳᓪᒥᐅᒃᑯᑦ ᐊᓯᖏᓐᓂᓗ ᐃᓚᒋᔭᐅᕙᒃᑐᓂ ᕿᑲᕐᕕᒃᓴᐅᓂᖓᓂ ᐊᐅᓛᕈᑎᒃᓴᖏᓄᑦ ᐊᑭᑐᓗᐊᕇᑲᑕᐅᔪᓂᒃ. ᖃᖓᑦᑕᐅᑎᒃᓴᑎᑦ ᓱᓕ ᓂᐅᕕᕐᓂᖏᒃᑯᕕᒋᑦ, ᐅᕙᑦᑎᓐᓄᑦ ᐅᖄᓚᓂᐊᖅᐳᓯ ᐅᕙᓂ 867.979.4209 ᐊᑭᑭᒡᓕᒋᐊᖅᓯᒪᔪᓐᓂᒃ ᐱᔾᔪᑎᔭᐅᔪᓐᓇᕋᔅᓯ ᓇᓗᓇᐃᒃᑯᑕᖃᖅᑎᑕᐅᕙᑦᑐᓂᒃ ᐊᑭᑭᓐᓂᖅᓴᐅᔪᓂᒃ. ᐊᓯᓕᒫᖏᓐᓂ ᐃᑲᔫᑎᒃᓴᖃᕐᒥᔪᖅ, ᓲᕐᓗ ᓄᓇᒃᑰᕈᑎᓂᒃ ᐊᑐᖅᑐᐊᕈᑎᓂᒃ, ᓄᓇᓯᐅᑎᑯᑖᒃᑯᑦ ᐊᐅᓛᕈᑎᒃᓴᓂᒃ ᐊᑭᑭᓪᓕᒋᐊᕈᑎᓕᖕᓂᒃ ᐊᒻᒪᓗ ᑐᔪᕐᒥᕕᖕᓂ. ᖃᐅᔨᒋᐊᕈᒪᒍᕕᑦ ᑕᑯᓂᐊᖅᐸᑎᑦ ᑕᐃᒃᑯᓇ ᐃᑦᑐᐊᖅᑐᕐᕕᒃᑯᑦ ᑕᐃᔭᐅᔪᖅ ᐃᓚᓕᐅᑎᓯᒪᔪᓄᑦ ᑕᐱᕆᔭᐅᔪᓄᑦ ᐃᑲᔫᓯᐊᒃᓴᐃᑦ.
ᑕᒡᕘᓇᑦᑕᐅᖅ ᐱᕕᒃᓴᖃᑲᐃᓐᓇᕈᒪᔪᖓ ᐃᖅᑲᐅᒪᖁᔨᓂᖅ ᑕᐱᕆᔭᐅᔪᓂᒃ ᑕᐃᒃᑯᐊ ᒫᓐᓇᐅᔪᖅ ᐃᓕᓐᓂᐊᖃᑕᐅᔪᑦ ᓄᖃᖓᓂᖏᓐᓂ, ᓄᑕᕋᐃᑦ ᓯᓚᒦ ᐊᓃᖃᑦᑕᕐᓂᐊᓕᕐᒥᖕᒪᑕ ᕿᑲᕐᓇᐅᓂᖓᓂ. ᐃᖅᑲᒋᔭᐅᕙᖕᓂᐊᖅᐳᑦ ᐃᓕᔅᓯᓄᑦ ᓄᑕᕋᐃᑦ ᐊᓃᖑᐊᖃᑦᑕᕐᓂᖏᑦ ᓇᓂᑐᐃᓐᓇᖅ, ᓄᓇᒃᑰᕈᑎᖕᓂᒃ ᐊᑐᓕᕌᖓᕕᑦ.
ᑭᖑᓪᓕᕐᒥ ᖁᔭᓕᔪᒪᒻᒥᔭᒃᑲ ᐃᓚᒋᔭᐅᖃᑕᐅᔪᑦ ᐃᖃᓇᐃᔭᕆᐊᖃᕐᓂᐊᖅᑐᑦ, ᐅᑕᕿᑎᑕᐅᓂᐊᖅᑐᓪᓗᓐᓃᑦ ᐃᖃᓇᐃᔭᖁᔭᐅᓂᕐᒥᓂᒃ ᕿᑲᕐᓇᐅᓂᖓᓂ. ᖃᐅᔨᒪᒐᑕ ᐱᔭᒃᓴᓕᒻᒪᕆᐅᓂᐊᕐᒥᔪᑦ ᑕᒪᒃᑯᓇᖓ ᐃᖃᓇᐃᔭᖅᑎᐅᔪᑦ.
ᖁᕕᐊᓱᑦᑎᐊᖁᕙᔅᓯ ᕿᑲᕐᓇᐅᓂᖓᓂ. ᓇᖏᐊᕐᓇᖅᑐᒦᑦᑕᐃᓕᓗᓯ ᐊᑕᕐᓇᖅᑐᖃᕈᓐᓇᖅᑐᒥ, ᐱᑦᑎᐊᖃᑦᑕᐅᑦᑎᕙᒡᓗᓯ ᐊᓯᓯᓐᓂᒃ, ᓯᕗᒧᓪᓗ ᐃᓱᒪᖃᕐᓗᑕ ᖃᓄᐃᓕᐅᒃᑲᓂᕈᓐᓇᕐᓂᑎᓐᓂᒃ ᐃᖃᓇᐃᔭᖅᑏᑦ ᑕᐱᕇᖏᓐᓂ ᑕᒫᓂ ᓄᑖᖑᓂᐊᓕᕐᒥᔪᒥ ᐊᕐᕌᒍᒥ 2024−ᒥ.
ᑕᐱᕇᓂᒃᑯᑦ,
ᔩᓴᓐ ᕈᓵᓐ ᐊᖓᔪᖄᖅ – ᓄᓇᕗᒻᒥ ᐃᖃᓇᐃᔭᖅᑎᑦ ᑲᑐᔾᔨᖃᑎᒌᖏᓐᓂ ᑕᐱᕇᖏᑦ