ᓄᓇᕗᒻᒧ ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒌᖏᓐᓄᑦ (NEU) ᓴᖅᑭᓪᓚᕆᓚᐅᖅᓯᒪᕗᑦ ᐊᐃᑉᕆᓕ 1, 1999-ᒥ, ᐱᒋᐊᓚᐅᕐᓂᖓᓂ ᓄᓇᕗᒻᒥ ᐊᕕᒃᑐᖅᓯᒪᓂᐅᔪᓂ. ᐸᕐᓇᒃᐸᓪᓕᐊᓕᓚᐅᖅᓯᒪᕗᑦ ᐊᕐᕌᒍᑦ ᒪᕐᕉᖕᓂ ᓯᕗᓂᐊᓂᐸᓗᒃ. ᓯᕗᓂᐊᓂ ᐃᓚᒋᔭᐅᔪᖁᑎᕗᑦ ᐃᓚᒋᔭᐅᓚᐅᖅᐳᑦ ᔫᓂᐊᓐ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᓄᑦ (UNW), ᐃᓚᒋᔭᐅᓪᓗᑎᒃ ᑭᒃᑯᑐᐃᓐᓇᕐᓄᑦ ᐱᔨᑦᑎᕋᖅᐸᖕᓂᕐᒧᑦ ᑲᑐᔾᔨᖃᑎᒌᑦ ᑲᓇᑕᒥ ᑲᑎᑎᕆᓪᓗᑎᒃ ᐊᕕᒃᑐᖅᓯᒪᔪᓂ ᐊᒻᒪᓗ ᕼᐋᒻᓚᓂ ᐃᖅᑲᓇᐃᔭᖅᑎᐅᔪᓂᑦ ᓄᓇᑦᓯᐊᕐᒥᑦ.
ᐱᒋᐊᕐᓂᖓᓂ ᓄᓇᑦᓯᐊᒥ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᖏᓐᓄᑦ ᑲᑐᔾᔨᖃᑎᒌᖏᓐᓄᑦ ᐱᒋᐊᓪᓚᕆᓚᐅᖅᐳᖅ, ᑭᖑᓂᐊᒍᑦ ᐋᖅᑭᒃᑕᐅᓪᓗᓂ ᔫᓂᐊᓐ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᓄᑦ. 1967-ᒥ ᐊᒥᓱᐃᑦ ᒐᕙᒪᑐᖃᒃᑯᓐᓂ ᐃᖅᑲᓇᐃᔭᖅᑏᑦ ᐱᓕᕆᔪᑦ ᓄᓇᑦᓯᐊᒥ, ᐃᓚᒋᔭᐅᒋᓪᓗᑎᒃ ᑭᒃᑯᑐᐃᓐᓇᕐᓄᑦ ᐱᔨᑦᑎᕋᖅᐸᖕᓂᕐᒧᑦ ᑲᑐᔾᔨᖃᑎᒌᑦ ᑲᓇᑕᒥ (PSAC), ᓅᑎᑕᐅᕙᓪᓕᐊᓕᓚᐅᖅᐳᑦ ᓄᓇᑦᓯᐊᒥ ᒐᕙᒪᒃᑯᓐᓄᑦ. ᕿᒪᐃᑎᑦᑎᓕᓚᐅᖅᐳᖅ ᔫᓂᐊᓐᒥ ᑭᒡᒐᖅᑐᐃᔨᖃᕐᓇᑎᒃ, ᑕᒪᓐᓇ ᐃᓱᒫᓘᑎᙳᖅᖢᓂ ᐊᒥᓱᓄᑦ. ᐊᒥᓱᐃᑦ ᑭᒡᒐᖅᑐᖅᑕᐅᖏᓐᓇᕈᒪᓚᐅᖅᑐᑦ ᑭᒃᑯᑐᐃᓐᓇᕐᓄᑦ ᐱᔨᑦᑎᕋᖅᐸᖕᓂᕐᒧᑦ ᑲᑐᔾᔨᖃᑎᒌᖏᓐᓄᑦ ᑲᓇᑕᒥ. 1968 ᕿᑎᖅᐸᓯᐊᓂ, ᑲᑎᙵᔪᐃᑦ ᓄᓇᑦᓯᐊᒥ ᒐᕙᒪᒃᑯᓄᑦ ᐃᖅᑲᓇᐃᔭᖅᑎᐅᔪᑦ ᑲᑎᖦᖢᑎᒃ ᐊᒻᒪᓗ ᐊᑎᓕᐅᕆᓪᓗᑎᒃ ᐅᓄᕐᓂᖅᓴᓂ 50%-ᒥ ᐃᖅᑲᓇᐃᔭᖃᑎᒥᓂᑦ. ᑖᒃᑯᐊ ᐃᓄᐃᑦ ᓄᓇᑦᓯᐊᒥ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᖏᓐᓄᑦ ᑲᑐᔾᔨᖃᑎᒌᙳᓚᐅᖅᐳᑦ.
ᐱᔪᓐᓇᖁᓪᓗᒋᑦ ᑲᔪᓰᓐᓇᖅᑐᒃᑯᑦ ᐅᖃᖃᑎᒌᖕᓂᒃᑯᑦ ᐱᔪᓐᓇᕐᓂᐅᔪᓂ, ᐃᖅᑲᓇᐃᔭᕐᓂᕐᒧᑦ ᒪᓕᒐᖏᓐᓂ ᑎᑎᕋᖅᑐᖃᕆᐊᖃᓚᐅᖅᐳᑦ. ᐃᖅᑲᓇᐃᔭᖅᑎᓄᑦ ᒪᓕᒐᖏᓐᓂ ᐃᓕᓯᒪᓕᖅᖢᑎᒃ, ᓄᕕᐱᕆ 1969-ᒥ, ᓄᓇᑦᓯᐊᒥ ᑭᒃᑯᑐᐃᓐᓇᓄᑦ ᐱᔨᑦᑎᕋᒃᐸᖕᓂᕐᒧᑦ ᑲᑐᔾᔨᖃᑎᒌᑦ (NWTPSA) ᐋᖅᑭᒃᑕᐅᑦᑎᐊᓚᐅᖅᐳᑦ ᐃᓕᓴᕆᔭᐅᓪᓗᑎᒃ ᐅᖃᖃᑎᒌᖕᓂᒃᑯᑦ ᑲᒪᔨᐅᓪᓗᑎᒃ (ᔫᓂᐊᓐ) ᑕᒪᕐᒥᒐᓚᒃ ᓄᓇᑦᓯᐊᒥ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᓄᑦ. ᒪᐃ 1970-ᒥ ᓄᓇᑦᓯᐊᒥ ᑭᒃᑯᑐᐃᓐᓇᓄᑦ ᐱᔨᑦᑎᕋᒃᐸᖕᓂᕐᒧᑦ ᑲᑐᔾᔨᖃᑎᒌᖏᑦ ᐃᓚᒋᔭᐅᓕᓚᐅᖅᐳᑦ ᑭᒃᑯᑐᐃᓐᓇᕐᓄᑦ ᐱᔨᑦᑎᕋᖅᐸᖕᓂᕐᒧᑦ ᑲᑐᔾᔨᖃᑎᒌᖏᓐᓂ ᑲᓇᑕᒥ. ᒪᐃ 15-ᒥ ᓇᓂᓯᔨᐅᔪᓂ ᑲᑎᒪᑎᑦᑎᓂᖃᓚᐅᖅᐳᑦ ᔭᓗᓇᐃᕝᒥᑦ, ᐊᒻᒪᓗ ᐅᖃᖃᑎᖃᖅᐸᓪᓕᐊᓕᓚᐅᖅᐳᑦ ᒪᐃ 20-ᒥᑦ.
1980-ᖏᓐᓂ, ᓄᓇᑦᓯᐊᒥ ᑭᒃᑯᑐᐃᓐᓇᓄᑦ ᐱᔨᑦᑎᕋᒃᐸᖕᓂᕐᒧᑦ ᑲᑐᔾᔨᖃᑎᒌᖏᑦ ᑲᑎᖅᓱᐃᕙᓪᓕᐊᓕᓚᐅᖅᐳᑦ ᐃᓚᒋᔭᐅᔪᒃᓴᓂ ᕼᐋᒻᓚᓂᑦ ᐊᒻᒪᓗ ᐃᒡᓗᓕᕆᔨᒃᑯᓐᓂᑦ. 1980 ᓄᙳᐊᓂ, ᔫᓂᐊᖑᔪᖅ ᐃᓚᓕᐅᔾᔨᓚᐅᖅᐳᑦ ᓯᕗᓪᓕᖅᐹᖑᔪᓂ ᓇᖕᒥᓂᖅᓱᖅᑐᓂᑦ ᐃᓚᒋᔭᐅᔪᓂᑦ. 1987-ᒥ ᐃᓚᒋᔭᐅᔪᒥ ᑲᑎᒪᓂᐅᔪᒥᑦ, ᓄᓇᑦᓯᐊᒥ ᑭᒃᑯᑐᐃᓐᓇᓄᑦ ᐱᔨᑦᑎᕋᒃᐸᖕᓂᕐᒧᑦ ᑲᑐᔾᔨᖃᑎᒌᖏᑦ ᐊᓯᔾᔩᓚᐅᖅᐳᑦ ᐃᓚᒋᔭᐅᓂᖏᑕ ᐊᑎᖓᓂ ᔫᓂᐊᓐ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᓄᑦ. ᓄᑖᖑᔪᖅ ᐊᑎᕆᔭᐅᔪᖅ ᓴᖅᑭᔮᖅᑎᑦᑎᓂᖅᓴᐅᓚᐅᖅᐳᖅ ᐊᖏᓂᖅᓴᒧᑦ, ᐅᓄᕐᓂᖅᓴᓄᑦ ᐊᔾᔨᐅᙱᓐᓂᐅᔪᓂ ᐃᖅᑲᓇᐃᔭᖅᑎᐅᔪᓂᑦ ᓴᓇᓯᒪᔪᓂᑦ ᔫᓂᐊᓐ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᓄᑦ.
ᓯᑎᐱᕆᒥ, 1997-ᒥ ᓂᕈᐊᖅᑎᑦᑎᓚᐅᖅᐳᑦ ᔫᓂᐊᓐ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᓄᑦ ᐃᓚᒋᔭᐅᔪᓄᑦ ᓄᓇᓕᖕᓂ ᐊᒻᒪᓗ ᐃᖅᑲᓇᐃᔭᖅᑐᓂ ᓄᓇᕗᙳᓛᖅᑐᒥ. ᐊᖏᖅᑐᒥ ᓂᕈᐊᕐᓂᐅᔪᒥᑦ ᑐᓂᓯᓚᐅᖅᐳᖅ ᔫᓂᐊᓐ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᓄᑦ ᑐᑭᒧᐊᖅᑎᑦᑎᔨᐅᔪᓂᑦ ᐱᓇᓱᐊᒐᒃᓴᒥᑦ ᓴᓇᓂᕐᒧᑦ ᐅᖃᐅᔾᔨᔨᓂᑦ ᑲᑎᒪᔨᕋᓛᖑᔪᓂᑦ ᐱᓕᕆᐊᒃᓴᖃᖅᑎᑕᐅᓪᓗᑎᒃ ᐊᕕᒃᓯᒪᔪᒥ ᐃᓚᒋᔭᐅᔪᒥ ᑭᒡᒐᖅᑐᐃᓇᔭᖅᑐᒥ ᓄᓇᕗᒻᒥ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᓄᑦ, ᓄᓇᕗᑦ ᐃᖅᑲᓇᐃᔭᖅᑎᓄᑦ ᓄᓇᑦᓯᐊᒥ ᐆᒻᒪᖅᑯᑎᓕᕆᔨᒃᑯᓐᓄᑦ ᑎᒥᖁᑎᐅᔪᓄᑦ ᐊᒻᒪᓗ ᔫᓕᐊᓐ-ᖑᖅᓯᒪᔪᓄᑦ ᐃᖅᑲᓇᐃᔭᖅᑎᓄᑦ ᓄᓇᕗᒻᒥᑦ ᕼᐋᒻᓚᒃᑯᓐᓂ ᐊᒻᒪᓗ ᐃᒡᓗᓕᕆᔨᒃᑯᓐᓂ. ᒪᐃ 5-6, 1998-ᒥ ᓄᓇᕗᒻᒥᑦ ᐅᖃᐅᔾᔨᔨᓄᑦ ᑲᑎᒪᔨᕋᓛᑦ ᑲᑎᓚᐅᖅᐳᑦ ᐋᑐᕚᒥ ᑭᒃᑯᑐᐃᓐᓇᕐᓄᑦ ᐱᔨᑦᑎᕋᖅᐸᖕᓂᕐᒧᑦ ᑲᑐᔾᔨᖃᑎᒌᖏᑦ ᑲᓇᑕᒥ ᑐᑦᑕᕐᕕᖓᓐᓂ ᐊᒻᒪᓗ ᑎᑎᕋᖅᐸᓪᓕᐊᓕᖅᖢᑎᒃ ᒪᓕᒐᕋᓛᓂᑦ ᓄᓇᕗᒻᒧ ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒌᖏᓐᓄᑦ.
ᒪᐃ 12, 1998-ᒥ, ᑭᒃᑯᑐᐃᓐᓇᕐᓄᑦ ᐱᔨᑦᑎᕋᖅᐸᖕᓂᕐᒧᑦ ᑲᑐᔾᔨᖃᑎᒌᖏᑦ ᑲᓇᑕᒥ ᑐᑭᒧᐊᖅᑎᑦᑎᔨᖏᓐᓄᑦ ᑲᑎᒪᔨᕋᓛᖏᑦ ᐊᖏᓚᐅᖅᐳᑦ ᓴᖅᑭᑕᐅᓂᖓᓂ ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒌᖏᓐᓂᑦ ᐊᒻᒪᓗ ᑎᓕᓯᓪᓗᑎᒃ ᔫᓂᐊᓐ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᓄᑦ ᓄᒃᑎᕿᓂᕐᒧᑦ ᑕᒪᕐᒥᒃ ᔫᓂᐊᓐ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᓄᑦ ᐃᓚᒋᔭᐅᔪᓂ ᓄᓇᓕᖕᓂ ᐊᒻᒪᓗ ᐃᖅᑲᓇᐃᔭᖅᑐᓂ ᓄᓇᕗᒻᒥ ᓄᓇᕗᒻᒧᑦ ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒌᖏᓐᓄᑦ. ᔫᓂ 11- 13, 1998-ᒥ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ ᐅᖃᐅᔾᔨᔨᓂᑦ ᑲᑎᒪᔨᕋᓛᑦ ᑲᑎᖃᑎᖃᓚᐅᖅᐳᑦ ᔫᓂᐊᓐ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᓄᑦ ᐊᒻᒪᓗ ᐊᖏᖃᑎᒌᒃᖢᑎᒃ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎᒥᑦ ᑕᐃᒫᒃ ᓄᓇᕗᒻᒥ ᐃᖅᑲᓇᐃᔭᖅᑎᑦ ᑐᓂᔭᐅᓇᔭᕐᓂᖏᓐᓂ ᐃᖏᕐᕋᐃᓐᓇᖅᑐᒥ ᐱᓕᕆᔾᔪᔾᔭᐅᓂᕐᒥᑦ ᔫᓂᐊᓐ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᓄᑦ ᑭᓯᐊᓂ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᑲᑎᐊᓂᒃᑯᑎᒃ ᐱᒋᐊᕐᓂᕕᓂᖓᓂ. ᓯᑎᐱᕆ, 1998-ᒥ ᑐᑭᒧᐊᖅᑎᑦᑎᔨᒧᑦ ᐃᑲᔪᖅᑎᒥᑦ ᐊᒻᒪᓗ ᐱᓕᕆᔾᔪᔾᔨᔨᐅᔪᒥᑦ ᓯᕗᓪᓕᐅᓪᓗᑎᒃ ᐃᖅᑲᓇᐃᔭᖅᑎᙳᓚᐅᖅᐳᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓂᑦ. ᐅᒃᑐᐱᕆ ᓄᙳᐊᓂ, 1998-ᒥ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᒪᑐᐃᖅᓯᓚᐅᖅᐳᑦ ᑐᑭᒧᐊᖅᑎᑦᑎᔨᓄᑦ ᑎᑎᕋᕐᕕᖓᓐᓂ ᐃᖃᓗᖕᓂᑦ.
ᐅᒃᑐᐱᕆ 16, 17, ᐊᒻᒪᓗ 18, 1998-ᒥ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᐱᒋᐊᕐᓂᕕᓂᖓᓂ ᑲᑎᒪᓂᖃᓚᐅᖅᐳᖅ ᐃᖃᓗᖕᓂ. ᖄᒃᑲᓐᓂᐊᒍᑦ ᐊᑐᓕᖅᑎᑦᑎᓂᕐᒧᑦ ᓄᑖᒥ ᑎᒥᐅᔪᒧᑦ ᒪᓕᒐᕋᓛᖏᓐᓂ ᐊᒻᒪᓗ ᒪᓕᒐᖏᓐᓂ ᐃᓚᒋᔭᐅᔪᑦ ᐱᒋᐊᕐᓂᕕᓂᖓᓂ ᑲᑎᒪᓂᐅᔪᖅ ᓂᕈᐊᖅᓯᓚᐅᖅᐳᑦ ᐊᖓᔪᖅᑳᒥᑦ ᐊᒻᒪᓗ ᐅᓪᓗᓕᒫᖅᓯᐅᑎᒥᑦ ᑐᑭᒧᐊᖅᑎᑦᑎᔨᒥᑦ. ᑕᒡ ᐅᐊᒃᒪᓐ ᓂᕈᐊᖅᑕᐅᓪᓗᓂ ᐊᖓᔪᖅᑳᖑᓂᕐᒧᑦ, ᒥᐊᕆᐊᓐ ᓚᕝ ᓯᕗᓪᓕᐅᓪᓗᓂ ᐊᖓᔪᖅᑳᑉ ᑐᖓᓕᖓᓄᑦ, ᐊᒻᒪᓗ ᐅᐃᓪᒪ ᐱᒐᓚᒃ ᒪᕐᕈᖓᓂ ᐊᖓᔪᖅᑳᑉ ᑐᖓᓕᖓᓄᑦ. ᐊᐅᓚᑦᑎᓂᕐᒧᑦ ᑮᓇᐅᔭᓂᑦ ᐊᑐᒐᒃᓴᓂ ᐊᒻᒪᓗ ᐃᓚᐅᒍᑎᓄᑦ ᐊᑐᖅᑐᒃᓴᓄᑦ ᐊᖏᖅᑕᐅᓚᐅᖅᐳᑦ ᐱᓕᕆᓂᐅᔪᒧᑦ 1998-ᒥ 2002-ᒧᑦ.
ᐊᓱᐃᓛᒃ, ᐱᒋᐊᕐᓂᕕᓂᖓᓂ ᑲᑎᒪᓂᐅᔪᖅ ᐃᓚᐅᔪᑦ ᐊᖏᓚᐅᖅᐳᑦ ᐊᑎᕆᓂᐊᖅᑕᖓᓂ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓂᑦ ᐊᒻᒪᓗ ᓇᓗᓇᐃᒃᑯᑕᖓᓐᓂ.
ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᑎᓴᒪᓂ ᒪᓕᒃᐸᓪᓕᐊᔪᓂ ᑲᑎᒪᓂᖃᒃᑲᓐᓂᖅᓯᒪᕗᑦ (2002; 2006; 2008 ᐊᒻᒪᓗ 2011-ᒥ) ᑕᐃᒪᙵᑦ ᐱᒋᐊᕐᓂᕕᓂᖓᓂ ᑲᑎᒪᓂᐅᓚᐅᖅᑐᒥ. ᐃᓚᒋᔭᐅᓂᖏᑦ ᐱᕈᖅᐸᓪᓕᐊᑦᑎᐊᖅᐳᖅ ᐊᒻᒪᓗ ᔫᓂᐊᓐ-ᖑᓪᓗᑎᒃ ᐱᒻᒪᕆᐅᓪᓗᑕ ᐊᒻᒪᓗ ᓴᖅᑭᔮᑦᑎᐊᖅᖢᑕ ᐱᓕᕆᔨᐅᓕᖅᐳᒍᑦ ᓄᓇᕗᒻᒥ.